كيف أبدأ التسويق؟ الردود العشوائية على الحسابات المشهورة #تسويق #كرافتي_تسوق


لأني شخصياً اشوف كثييير اساليب تسويقية خاطئة وترفع الضغط وتخلي الزبون المحتمل يكنسل الشراء من المتجر بدل الوثوق فيه ( مثلاً: احتلال هاشتاق ماله دخل بمجال شغلك – سرقة صور الانترنت عساس انها شغلك وتسوين نفسها – الاسلوب الشين بالتعامل والبطء بالرد لايام لكل سؤال .. الخ) ✨

فقلت بدال ما نجمع السلبيات ليه ما نساعد ونبحث عن اساليب ناجحة تساعدنا جميعاً لتسويق متاجرنا بشكل صحيح!
ونشوف تجارب بعض ونتعلم منها 💘

تذكري ان الانترنت المفيد هو شي تصنعينه بيدك! فكوني مساهمة لا متشائمة متربعه فقط 😜😂💘بالنسبة لي، اسهل اسلوب تسويقي مايتطلب الكثير من المال هو اعلانات انستغرام الترويجية وبرضو حصد الثقة من خلال وضع معلومات ودروس مجانية 💘 تاخذ وقت صح، لكن نتايجها تكون ممتازة وشبه مضمونه حسب نوعية وكمية الناس اللي يتابعونك باذن الله

محاولة تمويه اعلانك بكلمة (مشكوووور)  خلصت ٢٠٠٥ 😂💔

مسألة كيني ميني تراني ما أحبها وتنرفزني والله، وبحذف وبزعل اكثر من صاحبة الكومنت ترا!
خلونا نعطي براحة وبرضى وبابتسامة مو لازم تعلنين بكل موضوع، عزا فرح طقاق خلطة تبييض خشم إعلان! جالسه اعلمك تصلحين حسابك تقومين تخربين على نفسك ليه 🤦🏻‍♀️! الإعلانات بالكومنتات الشاطحة غللط! مو كذا تكسبين (معارف) وناس جدد! كذا تنفرين الناس منك ومن شغلك، يعني إذا ماتفرقين بين مكان الإعلان الصحيح وسالفة عن التعريف بالنفس كيف أتوقع منك تعرفين تسوين طلبي؟

يوجد مليون طريقة لكسب معارف وزباين بالكومنتات لكن ليست بطريقة (شوفي حسابي)، أرجعو للبوستات الأخيرة وراح تلقون متاجر محترمة تتناقش بالموضوع فقط وتضع تجاربها، ماحاولت تعلن لنفسها لكنها كسبت ثقة المشاهد، ليه؟ لأنك تقدر تعرف ان هالشخص مو أناني ولا يركز على هدف معين، بل إنسان يشارك تجربته ويفهم، ممايساعد على كسر حاجز الرهبة و (مدري هالمتاجر كاثره آخذ من مين ولا من مين)وغالباً يعني الواحد بياخذ من الشخص اللي يرتاح له، سواء دايم يقرى له، أو أسلوبه حلو بالكلام وردوده ع المتابعين لبقة، أو لقاه بنقاش عن هالمجال وكان يركز ع الإفادة مو على نفسه.

أن تركز فقط على المال أو الشهرة بيطيرهم منك 😂💔! تذكر: أنت تتعامل مع بشر، فكُن إنسانياً في تعاملك مع كل شيء حولك. الربح مهم، لكنه ليس كل شيء في عملك.

بيبسي و أديداس ماركزو على منتجاتهم، بل ركزو على من يستعمل منتجهم: حياته، مشاعره، وإنجازاته.
ولذلك حصلو على الولاء: ركزو على الزبون المحتمل وجعلوه يشعر بالفخر وبالراحة حول المنتج.
أنتي كصاحبة متجر، حاولي أن تكوني المرآة السعيدة والمفيدة لزبائنك المحتملين: سولفي بس بمواضيع ترتبط بمجال عملك، ردي ع المحتاج ولا تركزي انك تبيعي عليه، لأنه إذا بغى يشتري فغالباً بيجي لك لأن تجربته السابقة معك إيجابية.
لاتزعجي الناس ولاتكسري القوانين: أنتي بذلك تدخلي القائمة السوداء لكثير من الزبائن الجادين (مو اللي يشترون مره ويختفون)
ركزي على #تجربة_العملاء الإيجابية، وحاولي أن تصنعي هدفاً دائما أساسياً لايتزحزح: رضى عملائك الان = عملاء مستقبليين بإذن الله!

ورجاء، لاتسوون سبام في هاشتاقات مالها دخل بمجال متجركم أو مخصصة لحساب آخر أو حتى سبام في التاقات 😭!
تفوت أشياء مهمة ونتزعج من هالحركات ❌